ښکلي عکسونه داسې واخلئ!
لیکنه ـ ریاض مقامزی
کله چې پخپل کاري ژوند کې ستړيا احساسوو، نو هڅه کوو د کورنۍ له غړو او یا هم له نږدې ملګرو سره ښکلو سیمو ته په چکر لاړ شو. ددې خوندورو شېبو د خاطرو ساتلو لپاره انځور اخیستل تر ټولو ښه انتخاب کېدای شي. مګر د انځور اخیستلو لپاره باید ځينې ټکي په پام کې ونیسو. ددې لیکنې تر پایه پر همدې مهمو ټکو پوهېږئ.
لومړی| کیمره مو پاکه کړئ!
د انځورونو تر اخیستو وړاندې باید ځان ډاډه کړئ، چې پر کیمرې مو ګرد او دوړې پرتې نه وي. اکثره خلک انځورونه اخلي؛ خو کله چې له چکره ستنېږي نو په عکسونو کې تتوالی ویني، دا ځکه چې دوی د کیمرې صفایۍ ته پام نه وي کړی.
د کیمرې د پاکولو لپاره باید له داسې ټوټې کار واخلئ، چې نرمه وي. که له سختې ټوټې استفاده وکړئ، ممکن د ګټې پر ځای یې تاوان ډېر وي.
دویم| د موبایل روښنايي
که تاسو په موبایل کې انځور اخلئ. نو هڅه وکړئ د موبایل روښنايي "Brightness" مو "۱۰۰%" کړئ. په دې کار سره مو عکسونه خورا روښانه راځي. البته دا ځانګړنه په ټولو موبایلونو کې نه وي؛ خو بیا هم اکثریت موبایلونه همدا ځانګړنه لري. که غواړئ ښه انځور واخلئ؛ نو د عکس تر اخیستلو وړاندې مو د موبایل روښنايي ډېره کړئ.
درېيم| د لمر لوری وګورئ!
که په داسې ورځ کې انځور اخلئ، چې اسمان شین وي، نو د لمر لوري ته باید حتما پام وکړئ. عکس داسې واخلئ، چې لمر د انځور اخیستونکي شاته راشي، په دې معنا چې د لمر وړانګې د هغه کس لوري ته وي، چې عکس یې اخیستل کېږي. که داسې و نه کړئ عکسونه به مو ډېر تت، تیاره او بې خونده راشي.
څلورم| د تمرکز نقطه معلومه کړئ!
په انځورونو کې د تمرکز نقطه معلومول خورا اړین وي. په عکسونو کې کله شخص، کله منظره او کله نورې نقطې مهمې وي. نو تاسو باید پوه شئ، چې تاسو څه غواړئ. ددې کار ګټه دا ده، چې ستاسو پام هماغه څيز ته اوړي او په عکس کې د مهم ځای ښه راوستلو هڅه کوئ.
پنځم| له طبیعي کرښو استفاده وکړئ!
که په انځور کې معمولي کوږوالي موجود وي، یا هم د منظرې یوه برخه په کې غیر مناسبه راغلې وي نو عکس بېخونده کېږي. ددې لپاره چې انځورونه مو سم راشي طبیعي کرښو ته پام وکړئ. د انځور اخیستلو پر مهال حتما داسې زاویې او کرښې موجودې وي، چې ستاسو د انځور تناسب وساتي. یا که په لنډه توګه ووایم ستاسو انځور له کوږوالي څخه ساتي. د مېز څنډه، د غره لمنه/څوکې، د سړک امتداد، د انسان پر بدن واسکټ، دريځ/سټېج، د کوټې د چت یا لاندینۍ برخه او ګڼې نورې طبیعي کرښې موندلای شو، چې موږ پرې انځور له کوږوالي وساتو.
شپږم| لاس رېږدېدل
که په چکر تللي وئ او عکسونه مو اخیستل نو داسې کس ته کیمره ورکړئ، چې لاسونه یې نه رېږدي. ځکه چې د لاسونو رېږېدل د انځور کیفیت خرابوي. که بیا هم داسې څوک نه وي نو له تيږو او یا ځينو نورو څيزونو ګټه واخلئ چې ستاسو لاس له رېږدېدو وساتي. خو که هڅه وکړئ لاسونه مو له رېږدېدو ساتلای شئ. مثلا د انځور اخیستلو پر مهال تنفس اخیستل بند کړئ او...
اووم| ډېر عکسونه واخلئ!
د انځورونو په اړه مشهوره خبره دا ده، چې انځور اخیستل د شېبو ښکار دی. رښتيا هم همداسې ده. ټول عکسونه ښکلي نه راځي. بهترین عکس هغه وي، چې ښه شېبه پکې ښکار شي. نو کوښښ وکړئ ډېر انځورنو واخلئ او هغه یې له ځان سره وساتئ چې ښکلي راغلي وي.