بورسونو لپاره تحصیلي هدف Study Object څه دی؟
7. د بورسونو لپاره تحصیلي موخه یا هدف څه دی؟
What is a Study/Research Objective?
له هغه ځایه چې تحصیلي موخه (هدف تحصیل/تحقیق) د ماسترئ بورسونو د غوښتنلیک یا اپلیکیشن له خورا مهمو برخو څخه شمیرل کیږي، نو ومې غوښتل چې په دې برخه کې یو لنډ لارښود او یوه بیلګه درسره شریکه کړم.
د تحصیلي موخې لیکل آسانه کار ندی ځکه له یوې خوا کافي وخت ته اړتیا لري او له بلې خوا په خپله څانګه یا رشته کې باید ژوره مطالعه ولرو. د تحصیلي موخې د لیکلو او چمتو کولو لپاره باید لږ تر لږه شپږ میاشتې مخکې آمادګی ونیول شي.
ډیری نوماندان چې کله د بورسونو په هکله خبر شي، نو سمدستي او پرته له مخکینۍ مطالعې څخه د تحصیلی موخې پر لیکلو پیل کوي او داسې عمومي او غیر عملي سرلیکونه غوره کوي چې د هغوی د غوښتنلیک د ضعیفه کیدلو لامل ګرځیدی شي. د بورسونو د ټاکنې کمیټې له مسلکې کسانو څخه جوړه شوې ده او کچیرې ستاسو تحصیلي موخه ورته روښانه نه وي، نو په لومړئ مرحله کې یې رد کوي.
څنګه کولی شو یوه ښه تحصیلي موخه ولیکو؟
که څه هم د تحصیلي موخې د لیکلو لپاره کوم ځانګړی فارمت یا جورښت شتون نه لري، خو د دې لپاره چې چمتو شوې موخه مو د لوستوونکي لپاره واضیح وي، باید په څو مشخصو برخو (پاراګرافونو) وویشل شي:
لومړئ برخه: په دې برخه کې باید د شته ستونزې په هکله او همداراز د خپل تحصیلي هدف یا موخې په هکله په واضیح ډول معلومات ورکړۍ. یاده برخه لوستوونکي ته ستاسو د تحصیلي موخې په هکله باید پوره او کافي معلومات وړاندې کړي. (د بیلګې لومړی پاراګراف).
دویمه برخه: په دې برخه کې ستاسو د څیړنې موضوع پورې اړوند پخوانۍ زده کړې او کاري تجربه شامله ده. پدې برخه کې تاسو باید د خپلو زدکړو او کاري تجربې په هکله وغږیږئ او دا چې ستاسو علمي او کاري تجربې د تحقیق موضوع پورې څنګه تړاو لري، مفصل معلومات وړاندې کړۍ. (د بیلګې دوهم پراګراف).
دریمه برخه: دا برخه باید خنډونو او نوي سرچینو ته د لاسرسی نشتوالي باندې ډیر تمرکز وکړي او دا چې یاد خنډونه او ننګونې څنګه د دې لامل شوي تر څو موجوده ستونزې (د تحقیق موضوع) ته د حل لاره پیدا نشي، هم وغږیږۍ. همداراز په دې برخه کې د خپلې تحصیلې موخې د اغیزمنتیا په هکله او د هغې په مرسته د شته ستونزو د هواري په برخه کې مفصل معلومات وړاندې کړۍ. (د بیلګې دریم پاراګراف).
څلورمه برخه: پدې برخه کې، تاسو باید د ماسترئ د برنامې د بشپړولو څخه وروسته خپل کاري اهداف تشریح کړۍ. ستاسو د راتلونکو اهدافو پلي کولو څرنګوالی خورا مهم دی او پدې برخه کې باید تفصیلي معلومات ورکړل شي. (د بیلګې څلورم او پنځم پاراګرافونه).
د بورسونو نوماندانو ته ښه چانس !
____________________________
سکندر ځدران استاد پوهنتون کابل
نامزاد دوکتورا جرمنی
