لیکنه: شکېبا نادري، د راشد خان ارمان پېژندګلوي
زموږ د هېوادوالو ټول ژوند په جګړو کې تېر شوی، ټول هېوادوال مو د سولې او هوساینې لپاره تږي دي، تل د یوه هوسا ژوند هیله لري، غواړي د نورو هېوادنو د وګړو په څېر یو ارامه او له خوښیو څخه ډک ژوند ولري.
خو له دومره ستونزه سره سره بیا هم هڅه کوي چې پرمختګ وکړي او ځان له نورو هېوادونو سره برابر کړي چې تر ټولو غوره بېلګه یې زموږ د کرېکټ ملي لوبډله او د هغه لوبغاړي دي.
موږ په دغې لیکنې کې د نړۍ په کچه د غوره لوبغاړي 'راشد خان ارمان' د افغانستان د کرېکټ د ملي لوبډلې د مشهور توپ اچونکي او اتل په اړه معلومات درکوو، که تاسو هم د راشد خان ارمان مینه وال یاست او غواړئ په اړه یې پوه شئ، نو زموږ دا لیکنه تر پایه ولولئ!
راشد خان په ۱۳۷۷کال د وږي میاشتې په ۲۹مه نېټه د ننګرهار ولایت اچین ولسوالۍ کې زېږدلی دی، لومړی یې په ننګرهار کې کرېکټ پیل کړ، د خپل ځانګړي استعداد په واسطه یې په ډېر لږ وخت کې وکولای شو چې د افغانستان ملي لوبډلې ته لاره پیدا کړي.
ښاغلي ارمان په ۱۳۹۴ هـ ش کې د افغانستان د کرېکت د ملي ټيم غړیتوب تر لاسه کړ.
راشد خان اوس مهال ۲۳کاله عمر لري. دی د افغانستان د مشهورو توپ اچونکو یا بالرانو څخه دی، چې په ښي لاس توپ اچونه کوي. راشد خان هغه لوبغاړی دی چې د نړۍ په کچه یې په بېلابېلو لوبو کې ګډون کړی دی او ښې لاسته راوړنې لري.
راشد خان ارمان په ۱۳۹۵ او ۱۳۹۶لمریز کلونو کې د بنګلدېش د کومیلا ویکټورینز په لوبه کې ګډون کړی و. خان په ۱۳۹۷لمریز کې د نړۍ په کچه د غوره توپ اچونکي په توګه وپېژندل شو، په همدې کال کې د راشد خان نوم د کرېکټ په شل اوریزو لوبو کې د نړیوالې شورا په نوملړ کې ولیکل شو.
راشد خان څوڅو ځله په یو ورځنۍ لوبو کې هم د غوره لوبغاړي په توګه وپېژندل شو، په داسې حال کې چې د لومړي ځل لپاره د لوبو په تاریخ کې د راشد خان نوم د ویسډن کتاب (چې د نړۍ له لویو او غوره کتابونه څخه دی) ولیکل شو، راشد د هندوستان د غوره لیګ(ای. پي. اېل) تر ټولو قېمته لوبغاړی و، چې د نبي عیسی خېل سره یو ځای یې دا ټیم تر اتلولی پورې ورساوه.
د راشد خان دویم نوم یا تخلص ارمان دی، راشد خان تر دې مهاله د افغانستان د کرېکټ په ملي ټیم کې ۵۲ یو ورځنۍ لوبې کړې دي، ۱۱۸ وېکټې یې اخیستې دي، په ۳۶ نړیوالو شل اوریزو لوبو کې چې هره لوبه یې د نړیوالې شورا غړیتوب لري هم ګډون کړی دی، همدارنګه خان د افغانستان د کرېکټ الف ټيم لپاره ۵۹ لوبې کړې دي او په دغو سیاليو کې یې ۶۹ ويکټې اخيستې دي.
راشد خان د نړۍ په کچه یو نامتو توپ اچونکی یا بالر دی، خان د خپل هېواد ترڅنګ د ډېری هېوادونو په بېلابېلو لیګونو کې ګډون کړی دی، لکه هندوستان، پاکستان، بنګلدېش او اسټرالیا.
راشد خان د نړۍ په کچه هغه پېژندل شوې څېره ده، چې ټوله نړۍ یې پېژني، ده د افغانستان او افغانانو نوم په ټوله نړۍ کې لوړ کړی او ټول افغانان یې په نوم او لوبو ویاړي.