لیکنه ـ ریاض مقامزی
وايي له یو کس څخه د خوښۍ (خوشحالۍ) د راز پوښتنه وشوه؛ هغه ځواب ورکړ: "خوښي هله موندلای شئ چې وږي شوئ ډوډۍ وخورئ او چې خوب درغی ویده شئ."
د حکایت درسونه
شاید تاسو ته دا کيسه ګۍ ډېره عادي ښکاره شي او فکر به کوئ، چې کوم خاص پیغام یې نه درلود؛ خو داسې نه ده. دا حکایت موږ او تاسو ته خورا ښه پیغامونه راکوي، چې ځينې یې پدې ډول دي.
• هر څه پخپل وخت ترسره کړئ. که څه هم په کیسه کې د ډوډۍ خوړلو او خوب کولو خبره شوې؛ خو دا سل فيصد په همدې معنا نه ده. موخه دا ده، چې که تاسو محصل یئ نو تاسو درس ویلو ته اړتیا لرئ. لکه د درس وږي/تږي چې یئ، نو درس ووایئ. که پيسو تا اړتيا لرئ، نو د کار وږي/تږي یئ، نو کار کوئ. همداسې نورې بېلګې هم موندلای شئ.
• د تېر په اړه افسوس مه کوئ، ځکه چې له لاسه تللی وخت هېڅکله بېرته نه راځي؛ خو له تېر څخه حتما تجربه او عبرت اخلئ.
• د راتلونکي په اړه اندېښنه مه کوئ. ځکه چې سل فيصد ضمانت یې نشته؛ البته د راتلونکي په اړه یو واضح پلان او هدف حتما ولرئ.
• له نن یا همدې شېبې څخه ګټه واخلئ. ځکه چې همدا کار مو د روښانه راتلونکي تضمین هم کولای شي.
• له نن څخه ګټه واخلئ؛ خو د نن کار مو باید هېڅکله د وخت ضایع نه وي. بلکې داسې ګټه ورڅخه واخلئ چې راتلونکی مو هم روښانه کړي.